اما بتسند علي كتف العمر. بقلم الأديبة يسرى الصلاحي

اما بتسند علي كتف العمر
عكاز ايامك مش شايلك
بتقاوم ف طوفان اوجاعك
وحيطان احلامك بتساندك
وطريق الراحه تشوفه طشاش
مربوط ف الساقية وبتعافر
متغمى عينيك ما انتاش حاسس
ان كنت مقيم والا مسافر
ومرايه بيتكو السهتانه
بتشوفك تعمل مبسوطه
تضحك لك  ضحكتها المايصة
وتميل ع القصة المظبوطه
وتقولك اصل الشيب ده وقار
وشباب القلب اكيد باقى
تنزل تدلع ع السلم
ركبك بتخبط مش لاقى
فبتسند علي حيط ايامك
ملعونه مرياتك خداعة
وتفوق من وهم انك عايش
تخطف من زمنك لو ساعة
وبواقى الحلم الى حلمته
افتح لك به دفتر توفير
لحظات الفرح قوام عينها
وف بنك الدنيا أحفر لك بير
وبلاش تتمرد ع عيشتك
وف مسرح ايامك غنى
احضن لحظاتك ولاعبها
وتعيش مع نفسك متهنى
والنجمة ان نادت متردش
واعمل بقى نفسك مش سامع
وان ضاقت تانى متياسي
راح تفرج مع اول جامع
يسرى الصلاحى

***********************

***********************