وانت بعيد
ماسك احلامك بالايد
وعنيك باصه على الايام
ارسم تفاصيل اللي يبان
كَبر خط الحظ شويه
واسرق فرحه من الاحلام
د الحزن زمان
كان ساكن فوق الاغصان
يبدور تجاعيد العمر الوان
والشجر الماسك ف جذوره
لسّاه حاضن عطر الطين
رغم الامه
وطولة باله
برغم همومه
لساه يدي كتير امثال
و الحب مُحال
يسكن تجاعيد الاحلام
وقت الليل ما يطول
م العمر فصول
تتمرجح ف حواري المشاوير
ترميلك ضي من الشباك
او تستناك
مع اول ضوء
مسكينه يا شجره احلامي
مزروعه ف قلب خريف
ترمي الكوابيس
او تحدف ضلمه ف منامي
معقوله الحب اللي جمعنا
بقي شكله مخيف
معقوله النبض المتفرفط
جوه التجاويف
مدبوح وبيصرخ علي حاله
في ليالي الصيف
وانت بعيد
ارسم تفاصيل اللي يبان
على حيط الليل
واعزف موال
سيد منيرعطيه
***********************
***********************
ليست هناك تعليقات:
إرسال تعليق