هل يعود الماضي بقلم الأديب. عوني هشام

هل يعود الماضى
=========== عونى هشام

انا انا انا
انا مش عارفكم كلكم
عارف شويه صغيرين
طب مين هنا عارف زمان
والطشت مليان بالعجين
ولا الكانون ابوقش وشوية حطب
راح الزمان
 وبقينا مع زمن العحب
العيب فى مين
العيب معايا قبلكم
يمكن كتير يمكن اقل منكم
انت ...هو. انتى.  هىّ
طب هو ايه وهىّ ايه
مين الشريف
 ومين بيكبش بالايدين
دا كله من فعل الضمير اللى هرب
وكان زمان
حارس بزمه وعنده دين
حد عارفنى .....عدت سنين
يمكن عارفنى فى الصوره وخلاص
او كنت شفته
ذات مره فى الصباح
واحنا بنشقى ومحرومين
وكان عرقنا ترياق الجراح
كنا فى حاره
كانت بتمسك ناصيتين
واهلها ناس طيبين
وكان شيخ حارتنا
  عمنا الشيخ ياسين
زمه ودين
 الان ظروفه مبهدله
الجزمه فردتين يمين
وعصايه جنبه بتعدله
ولاده فين؟؟
كل واحد راح مكان
وصحابه تاهوا فى الزمان
وماعنده حل المعضله
شوارعنا  كانت من تراب
وكانت نظيفه مرتبه
مفيش زباله جنب باب
وهوانا خالى الاتربه
دلوقتى ال زمن الحضر
مين فيكوا غاب ومين حضر
ياريت زمان .. زمان يعود
احنا فى زمان بيحتضر
الابن قام يلعن ابوه
والاخ قام يضرب اخوه
ياناس ياهووووه
عايشين بذنب
نطلب من الله بغتفر
انا قلت ايه؟
معلش انا طالب السماح
ولا بلاش اصل السماح
فى ها الزمان
عُمله اساسها من الحجر
حد افتكر
مين النهارده
اعطى لابوه حبة ودوا
حتى الكريم
 فى زمانا بقى كرمه بهوى
واللى بيكوى الناس
 فى يوم هاينكوى
مشيت معاكم شوط كبير
يمكن نفوق نرجع سوى
ارجع معاكم  ؟؟ انتوا مين
ياريت الزمان يرجع ورى
انا انا انا
انا مش عارفكم كلكم
عارف شويه صغيرين
وبقيت انا والشيخ ياسين
موضه قديمه
عايشين فى ركن بعدكم
============
#عونى_هشام

***********************

***********************