حلمي انحني | بقلم | رضا ابو الغيط| عزف الأقلام العربية

داخل حدود المنحني
حلمى انحني
وانا لسه واقف مطرحي
فوق مسرحي
نفسي ادوق طعم. الهنا
نفسي اسابق.....خطوتي
وارسم بإيدى ....فرحتي
فوق الخدود المشتاقين
تلقي الأمل
طارح سنابل ف الغيطان،
من فرحته باللي اهتدي
واللي ابتدى
من غير خجل
يرسم طريقه وسكته
وماهمهوش
عتمة قلوب الأكمنه

داخل حدود المنحني
الشعر شاب
والسهم صاب
قلبى الشباب
والحلم لخضر والضنا
اما انا
مازلت واقف ف المدى
فارد دراعي للسما
وكفوفي دى متعشمه
تتحني م الشمس بنهار
طارح خضار جنب العمار
للي احتفي
بميلاد مشاعر طيبه
داخل حدود الاورده
للي مناه يلقي الرضا
وينول جميع الأوسمه
داخل حدود المنحني
لسه الكفوف متعشمه
توصل لفوق ...
لأبعد مدي........
وتنول شرف لمس القمر
وتحني بيه كف البشر
بس البشر من حقدها
علي اللي ابتدي يحلم يفوق
وينول مناه ويبص فوق
قامت تكتف خطوته
بحبال عَجز
قامت تجمع ف الموانع كلها
وتحطها
علي باب زوايا المنحي
لجل ما تقتل فرحته وتموته
لما يموت
حلمه الوحيد اللي ابتدي
يخضر لونه ف المدى
ويكون له ميت مليون صدى
ويفوت زوايا المنحني
لسه البشر
م الغل هتموت م القلق
رافضه صعود
خطي البياني ع الورق
وانا بين زوايا المنحنى
************************
رضا ابو الغيط

٢٠

***********************

***********************