رسالة لغريمي
إلى صاحبي اللي بات مجروح
ولسه دموعه على خده
ولسه الحزن بيشده ..
لسابع بيير
من التوهة وم التفكير
وكان الحلم بين منهم . .
كما عيشته زمان قبله
وكنت الحِب والعاشق
وراشق ليل نهار بينها
بتكتبني ف عناوينها
وبكتبها كتب للنور
أتاري الحلم كان بالزور
مابيني وبينها ومابينك
ياريت تسمعني بالأحداث ..
وشيل الغمة عن عينك
أنا الأول يا عم العاشق الثاني
ولو جاني ومجني عليه
تبات ف الحسبة دي الجاني
وهي بريئة ف الحالتين
ومظلومة ومصدومة ..
قالتلك إني أنا قبلك
دخلت الباب من الطلة
حروفك روعة عبدالله 💚
كلامك يخطف الأحاسيس
يدوبك كلمة ف التانية
وعشنا الملحمة ع الفيس ..
وع الواتس اللي كان مخصوص
عشان البوسة قبل النوم
وصور اللهفة والتذكار
ونختم ورد م الأذكار
على ريق الكلام تخاطيف
وطيف عُشاق كتير غابوا
سواء عايشينها أو سابوا
سيرتهم لسه ربطاهم
وعيشانا حكاويهم
نغير منهم ونغريهم
سطور القصة والراوي
تبات عاوزة وانا غاوي
غناوي الحب تذكرنا
بتفضح كل أسرارنا ..
إذا اتسمعت بإحساسنا
إذا اتخلطت بأنفسنا ...
وكل الدنيا والملكوت
يدوب أوضة على مقاسنا
دخلنالها كذا مرة
ف ساعة من ساعات الشوق
مانحسبهاش ونتعرى ..
من الواقع وم المفروض
ومن كل الحدود والناس
وبما إني أسير إحساس
آمنت لكل ألاعيبها
ماكنتش يوم باكدبها
وإني حبيبها والخيال
لغاية لما مال صوتها ..
سمعت الرعشة في سكوتها
عرفت بإني تسلية
وإن اللعبة كات غية
وفي بينا أكيد واحد
بتهديه اللي كان ليا
تصدق ان شكلك بان
وأيقنت إن انا بتخان
لكني اختارت ما اكشفهاش
ولا احرمهاش من اللذة
بتشرب دمعتي خمرة
ومن وجعي بقيت مزة
إذا اشتاقت لطعم مثير
تخيل يا غريمي كتير ..
حصل بينا ما بوحتش بيه
أقولك ليه .. عشان خاطرك
عشان ما اجرحش ف مشاعرك
لأني عرفت من شعرك حبيبتك مين
وإنك زي مني رهين ..
حلاوة سمها وشارب ..
وعاشت بيك بتتعاجب
وجه وقتك تقول الآه
وتشكيها لخلق الله
ولو قالت متين عوزاه
هاتطلع برضه مش عاجب.
ليست هناك تعليقات:
إرسال تعليق