مابين اللفه والشيبه
طوانى الصعب والعاصى
وبين السهل والهين
مآسى تهد إخلاصى
وأنفاسى بتتمنى
تشم الأهه مبتسمه
وبين الوعد والقسمه
سنين العمر تكعيبه
مدليه الشقا ألوان
لاخلتنى فى يوم ارتاح
ولا وسط الجراح بانت.
ثوانى وشها فرحان..
يوماتى الحيره تروينى
وترمينى الأمانى بعيد
ودقة قـلبى باصه لى
وروحى دمعها بيزيد
وبين الساعة والساعه
بريد الغربه يقرالى
رسايل عينى ملتها
وهاتها البر يا شاعر
بلاش العند
لاتسافرمترجعشى
ماترفعش سيوف القول
وتركب طيشك الرهوان
هترجع م السبق خسران
ونون النسوه هتطولك
ياريت تدارى فى قليلك
وتطبيلك وتهليلك
أخرهم ذى أولهم
لاتقدر يوم تشاكلهم
ولا تقدر تشكلهم
ولو فكرت تشكى لهم
هيدولك مشاكلهم
صحيح يا عم يا قوال
جبال الصبر
من كومك ومن كومى
ومهما اللعبه هاودتنا
مسيرنا يقشنا الكومى
ونومى يشتهى عينى
ونومك يسرقه التهديد
بعيد الحلم عن شنبى
وعن شنبك
وتمنك مايساويش قشه
وتمنى مايساويش ريشه
حلال العيشه ولاحرام
جرام السم مش كافى
باشيل الليل على كتافى
وأعافى ع النهار وأحبى
وأعض الأرض كام عضه
بتتقضى واهى سايرة
ودايره بالف جواها
هواها ملك لاسيادى
وشادى الهم لولادى
ونادى العمر قدمنى
ليلاتى قرد بصديرى
وخيرى لغيرى بتسرب
ويهرب فص بنك وداب
ويرجع فى الجراب أرنب
بيشرب بن برازيلى
يجيلى الأمر متحوج
واقول شوبيك يا تأخيرى
وتقديرى مابيشمش
لأن الريحة ماتهمش
وبات المر يملانى
وتوهة عمرى واخدانى
مابين أسمى وعنوانى
وطول مالغيره ماسكانى
هاسود قلب أوراقى
شراقى الجد صبحنا ومسانا
ونسانا مصالحنا
وفسحنا فى دهبيه
فى عرض الهم لقيناها
وراها ألف جنيه
وموج النيه شرقنا
غرقنا وساحت الديه
منديّ الحياه واحنا
جروح الروح منديه
رديه الدنيا قدامى
بتهدم كل أحلامى
بقيت للخوف معديه
وذاد الفرق حوالىَّ
مابين الصعب والعاصى
***********************
***********************
ليست هناك تعليقات:
إرسال تعليق