مصر بتسلم عليك
يا إبني بتطبطب عليك
مصر جت تنده عليك
بس كان الخوف مغطي
يلا يا أحمد قوم و خطي
بس أوعي يا واد توطي
إوعى تزعل منها يا أحمد
مصر لسه فارده عودها
شابة و بتزرع ورودها
لو في يوم دمعتها نزلت
قوم أوام إمسح خدودها
حتي لو خَلفت كلامها
حتي لو نقضت وعودها
مصر لسه جميلة يا أحمد
رغم إن الكوسة سايدة
رغم إن الجوع بيطحن
رغم إن جراحنا زايدة
لسه فيها النيل بيضحك
لسه فيها أوبرا عايدة
لسه بتخاف ع البنات
مصر دي سكر نبات
لسه فيها ماما نجوي
بس ( بقلظ ) يا إبني مات
بقلم .. مصطفي تيسير
" بقلظ عروسه قماش كان بيعبر عن الطفوله في برنامج صباح الخير لماما نجوي ابراهيم دا طبعا ايام ما كان في طفوله )
***********************
***********************
ليست هناك تعليقات:
إرسال تعليق