قصيدة الظروف عاميه
لما الكتاب
تتمحي منه الحروف
واما الكلام
ينحبس في الحلق خوف
يبقي اللي بيـنا بينـتهي
ونقول ظروف
نفس الظروف !
حجه لحكايات
ملينا بيها الرفوف
ولجل الضمير يرتاح
القسمة موجوده
كل اللي الليلة باع
عملها حـدوته
وأن يوم جفانا الندم
بعد الكلام ما يموت
نقول انه كان القدر
خلف ما بينا حدود
بس انت من جواك
عـارف الـقصة !
بعت اللي كان وياك
والحجه علي القسمة
لو ذنبي اني فقير
وإديه مش طايله
فانا ربي رب كبير
والدنيا مش دايمه
والفقر مش عيبه
العيبة في الحوجة
والعيبة تكون علي بر
وتـسحبك مـوجه
مدام نويت الفراق
متؤلش مكتوبه
يا ام العيون جرحه
سبتيلي بعدك أيه
مش كنت أنا الفرحة
خلفتي عهدك ليه
مليتي صدري ملام
وزرعتي فيه الخوف
لو عيني زرها دموع
من نـفسي بكـون مكسوف
وازي ... ازاي يكون لي دموع
تقبلها علي حالي ؟؟
طب كنت فوت لي شموع
دموعها تحلالي
وتصبّر بحرقتها
علي حرقه أحلامي
كل اللي حـاذذ فيه
قلبي لؤاك ملهوف
بتخدني رجـليه
لبيـتك اسعي وطوف
وان فوت علي ذكري
الخطوة تبقي وقوف
لسه في عينيه النَظّر
وكإِني بقيت مكفوف
وسؤال محيرني
مش لاقي لإجابته حروف
هو الفراق قسمة ؟
ولا فراقنا ظروف ؟؟
شاعر سكندري
***********************
***********************
ليست هناك تعليقات:
إرسال تعليق